यानंतर सन्माननीय चंद्रशेखरजी बावनकुळे हे भारतीय जनता पार्टीचे प्रदेशाध्यक्ष झाल्यानंतर त्यांच्या टीम मध्ये भाजपा प्रदेश महासचिव म्हणून महत्वपूर्ण जबाबदारी माझ्यावर इतक्या कमी वयात पक्षाने फार मोठी जबाबदारी माझ्यावर सोपवली. यातून भारतीय जनता पार्टीची कार्यपद्धती ही स्पष्ट होते. घराणेशाही अथवा अन्य कोणत्याही गोष्टीला थारा न देता सामान्य परिवारातील एका व्यक्तीला इतक्या मोठ्या जबाबदारीपर्यंत केवळ भारतीय जनता पार्टी घेऊन जाऊ शकते. सध्या, भारतीय जनता पार्टी प्रदेश महासचिव म्हणून या जबाबदारीला न्याय देण्यासाठी सातत्यपूर्ण प्रयत्न करत आहे. साल 2000 पासून 2017 पर्यंत सातत्याने संघटनात्मक कामकाजात कार्यरत राहिलो परंतु लोकप्रतिनिधी होणे हे उराशी बाळगलेले स्वप्न कायम होते आणि म्हणून प्रभागातील जनतेची सेवा सुद्धा अविरतपणे सुरूच होती, याचे फलित म्हणून माझ्या प्रभागात झालेल्या अटीतटीच्या लढतीमध्ये समोरून फार मोठ्या धनशक्तीचा वापर होऊनही जनतेने भरभरून आशीर्वाद दिले व 2017 साली पनवेल महानगरपालिकेचा नगरसेवक म्हणून निवडून येऊ शकलो. यानंतर पनवेल महानगरपालिकेच्या उपमहापौर पदाची महत्त्वपूर्ण जबाबदारी व सन्मान मला प्राप्त झाला या माध्यमातून शहरातील नागरिकांच्या असंख्य अडचणी सोडविण्याचा मनापासून प्रयत्न केला.